Кувайтлик экспертлар Ўзбекистондаги Президент сайлови очиқлик ва демократия тамойиллари асосида ўтишига ишонч билдирди
Олдинда турган Ўзбекистон Президенти сайлови хорижий мамлакатларнинг эксперт доиралари вакилларида ҳам катта қизиқиш уйғотмоқда. «Жаҳон» агентлиги Кувайт нашрларида журналистлар ва экспертлар бу борада билдираётган фикрларни келтирди.
Муҳаммад ал-Халидий, Кувайтда нашр этиладиган «Ал-Анба» газетаси муҳаррири:
«Ўзбекистон ва Кувайт дўст мамлакатлар ҳамда минтақадаги муҳим шериклар ҳисобланади. Биз Ўзбекистонда ўтказиладиган Президент сайловларига тайёргарликнинг боришини катта қизиқиш билан кузатиб бормоқдамиз. Чунки бу тадбир муҳим сиёсий воқеа ҳисоблангани ҳолда кўп жиҳатдан мамлакатнинг бундан кейинги тараққиётини белгилаб беради. Олдинда турган сайловларда тўртта сиёсий партиядан номзодларнинг иштирок этиши мамлакатда сайловлар демократия тамойиллари асосида ўтказилишидан далолат беради. Ўзбекистон минтақанинг энг муҳим мамлакатидир. Биз мустақил ривожланиш йиллари давомида республикада рўй берган демократик ўзгаришлар натижаларини ҳамда иқтисодиёт жабҳасида қўлга киритилган кенг кўламли муваффақиятларни ижобий баҳолаймиз. Ўн йилдан зиёд давр мобайнида мамлакатда барқарор ўсиш кузатилмоқда. Бугунги кунда Ўзбекистон дунёнинг иқтисодиёти энг тез ривожланаётган беш давлати қаторидан жой олган. Буларнинг барчаси Ўзбекистон тўғри танлаган демократик ва иқтисодий тараққиёт йўли ўзини тўла оқлагани ҳамда бошқа мамлакатлар учун ижобий намуна бўлганидан далолат беради. Ўзбекистон Республикаси биринчи Президенти Ислом Каримов қайд этганидек, иқтисодий мустақилликка эришмасдан сиёсий мустақилликни таъминлаш мумкин эмас. Ишончим комилки, олдинда турган Ўзбекистон Президенти сайловлари кўп сонли хорижлик кузатувчилар иштирокида очиқлик ва шаффофлик муҳитида ўтади. Ўзбекистон халқи муносиб номзодни ёқлаб овоз беришига ишончим комил».
Ҳамед Ҳафез ал-Абдулла, Кувайт университети Ижтимоий фанлар факультети деканининг ўринбосари:
«Олий ўқув юртининг профессори сифатида Ўзбекистонда илм-фан, таълим, соғлиқни сақлаш, маданият, санъат ва спорт сингари соҳаларни ривожлантиришга қаратилаётган эътибор ҳақида сўзлашни истар эдим. 2014 йили Ўзбекистондаги парламент сайловларида халқаро кузатувчи сифатида иштирок этган чоғимда халқаро андозалар даражасида сифатли таълим олиш учун зарур барча шароитлар яратилганига гувоҳ бўлган эдим. Республикада яратилган таълим ва тарбиянинг янгича тизими муваффақият билан ҳаётга тадбиқ этилмоқда. Ўзбекистон — ёш, замонавий ва шитоб билан ривожланаётган мамлакат. Республика аҳолисининг асосий қисмини ёшлар ташкил этади. Бу эса мамлакат порлоқ келажакка эга эканлигидан далолат. Шу ўринда ўзбек ёшлари юқори даражада билимга эга эканликларини ва улар барча соҳаларда ўз мамлакати салоҳиятини мустаҳкамлашга муносиб ҳисса қўшаётганини қайд этиш зарур, деб ўйлайман. Ўзбекистон спорт усталари жорий йилда Бразилиянинг Рио-де-Жанейро шаҳрида бўлиб ўтган XXXI ёзги Олимпия ўйинларида эришган муваффақиятлар энг юқори баҳога лойиқдир. Олдинда турган Ўзбекистон Президенти сайловлари юксак даражада, шаффофлик, очиқлик ва демократия тамойиллари асосида ўтишига шубҳа йўқ».
