15-oktabr, shanba kuni O‘zbekiston “Adolat” sotsial-demokratik partiyasi (SDP)ning VIII qurultoyi bo‘lib o‘tdi. Unda 195 delegat ishtirok etdi, deya xabar bermoqda UzReport.
Qurultoyda “Adolat” partiyasidan O‘zbekiston Prezidentligiga nomzod va uning saylovoldi dasturiga oid masalalar ko‘rib chiqildi.
Qurultoyda partiya siyosiy kengashining 17-sentabrida bo‘lib o‘tgan plenumi qaroriga muvofiq, kengash raisi, Oliy Majlis Qonunchilik palatasidagi partiya fraksiyasi rahbari Narimon Umarovni O‘zbekiston Prezidentligiga nomzod sifatida ilgari surish masalasi muhokama qilindi.
Delegatlar Narimon Umarovni O‘zbekiston Prezidentligiga nomzod etib ko‘rsatish taklifini bir ovozdan qo‘llab-quvvatladi.
Shundan so‘ng qurultoy qatnashchilari nomzodning saylovoldi dasturi bilan tanishdi. Ular tomonidan ma’qullangan dastur partiyaning markaziy va quyi bo‘linmalariga saylovoldi targ‘iboti o‘tkazishda foydalanish uchun tavsiya etildi.
Ma’lumot uchun, O‘zbekiston Prezidenti saylovi 4-dekabr kuni bo‘lib o‘tadi. Bungacha O‘zbekiston Xalq demokratik partiyasidan O‘zbekiston Prezidentligiga Hotamjon Ketmonov nomzodi tasdiqlangan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)