15 октябрь, шанба куни Ўзбекистон «Адолат» социал-демократик партияси (СДП)нинг VIII қурултойи бўлиб ўтди. Унда 195 делегат иштирок этди, дея хабар бермоқда UzReport.
Қурултойда «Адолат» партиясидан Ўзбекистон Президентлигига номзод ва унинг сайловолди дастурига оид масалалар кўриб чиқилди.
Қурултойда партия сиёсий кенгашининг 17 сентябрида бўлиб ўтган пленуми қарорига мувофиқ, кенгаш раиси, Олий Мажлис Қонунчилик палатасидаги партия фракцияси раҳбари Наримон Умаровни Ўзбекистон Президентлигига номзод сифатида илгари суриш масаласи муҳокама қилинди.
Делегатлар Наримон Умаровни Ўзбекистон Президентлигига номзод этиб кўрсатиш таклифини бир овоздан қўллаб-қувватлади.
Шундан сўнг қурултой қатнашчилари номзоднинг сайловолди дастури билан танишди. Улар томонидан маъқулланган дастур партиянинг марказий ва қуйи бўлинмаларига сайловолди тарғиботи ўтказишда фойдаланиш учун тавсия этилди.
Маълумот учун, Ўзбекистон Президенти сайлови 4 декабрь куни бўлиб ўтади. Бунгача Ўзбекистон Халқ демократик партиясидан Ўзбекистон Президентлигига Ҳотамжон Кетмонов номзоди тасдиқланган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)