Portugaliyalik futbolchi Krishtianu Ronaldu, serbiyalik tennischi Novak Jokovich, chexiyalik futbol darvozaboni Petr Chex va Angliyaning “Lester” futbol klubi Ginness rekordlar kitobining 2017-yilgi nashriga kiritildi. Bu haqda “TASS” xabar bermoqda.
Guinness World Records saytida ma’lum qilinishicha, Ronaldu Twitter ijtimoiy tarmog‘ining eng mashhur sportchisiga aylandi — 2016-yil 7-oktabr holatiga ko‘ra uning mikroblogida 47 million 262 ming 909 obunachi bor. Jokovich bir tennis mavsumida qo‘lga kiritilgan mukofot pullari hajmiga ko‘ra rekord o‘rnatdi — 2015-yili bu ko‘rsatkich 21460145 dollarga teng bo‘ldi.
Petr Chex Angliya Premyer-ligasida boshqa barcha darvozabonlardan ko‘proq — 181 — uchrashuvda o‘z darvozasi daxlsizligini saqlab qoldi. “Lester” jamoasi esa 2014/2015-yilgi mavsumda 13-o‘rinni egallab, keyingi mavsumning chempioniga aylandi. Bu Premyer-ligada ikki mavsum ichida kuzatilgan rekord darajadagi ko‘tarilish bo‘ldi.
Shuningdek, rekordchilar ro‘yxatiga angliyalik futbolchi Garet Barri kirdi — u Premyer-ligadagi 580 uchrashuvda asosiy tarkibda maydonga tushdi. Amerikalik tennischi Serena Uilyams esa Katta dubulg‘a turkumi turnirlarida qo‘lga kiritilgan birinchi va oxirgi titul orasidagi eng uzun muddatni qayd qildi (1999 va 2016-yillar).
Izoh (0)