O‘zbekistonda gaz uskunalarini ta’mirlatish uchun internetdan ariza berish mumkin bo‘ldi

Yagona interaktiv davlat xizmatlari portalida masofadan turib “O‘ztransgaz” kompaniyasining hududiy va tuman bo‘linmalariga tabiiy gazning sizib chiqishini bartaraf etish va gaz uskunalarini ta’mirlash uchun ariza berish imkoniyati paydo bo‘ldi. Bu haqda Yagona portalda axborot berilgan.

“Tabiiy gazning sizib chiqish holati yuzaga kelganda, tabiiy gaz ta’minoti muassasi mutaxassisi uni bartaraf etish so‘rovi tushgandan so‘ng, zudlik bilan tegishli ishlarni amalga oshirish uchun voqea joyiga tashrif buyuradi. Gaz uskunalarini ta’mirlash ishlarini o‘tkazish uchun mutaxassisning tashrifi bir ish kunida amalga oshiriladi”, — deyiladi Yagona portal axborotida.

Qayd etishlaricha, gaz uskunalarini mutaxassis tomonidan ta’mirlanishi to‘lov asosida kelishilgan narxda yoki tasdiqlangan preyskurantga muvofiq amalga oshiriladi. O‘z navbatida, tabiiy gazning sizib chiqishini bartaraf etish mutaxassis tomonidan bepul amalga oshiriladi.

“Yagona portal foydalanuvchilaridan elektron ariza jo‘natish vaqtida qo‘shimcha hujjatlar talab etilmaydi”, — deyiladi portal axborotida.