O‘zbekiston Prezidenti vazifasini bajaruvchi Shavkat Mirziyoyev 18-sentabr, yakshanba kuni Yunusobod tumani hokimligida Toshkent shahri va tumanlari hokimliklari, boshqa mutasaddi idoralar rahbarlari va faollari ishtirokida yig‘ilish o‘tkazdi. Bu haqda “Toshkent oqshomi” gazetasi xabar bermoqda.
Xabar berishlaricha, ish faoliyatida muntazam qoloqlik va jiddiy kamchiliklarga yo‘l qo‘ygani uchun Mirzo Ulug‘bek tumani hokimi Shomansur Ahmedov hamda Ichki ishlar boshqarmasi boshlig‘i Saidakbar Po‘latov egallab turgan lavozimidan ozod etildi.
“Tumanning bir qator mutasaddi idoralari rahbarlari — prokuror Timur Normuhammedov, davlat soliq inspeksiyasi rahbari Abdurauf Karimov jiddiy ogohlantirildi”, — deyiladi “Toshkent oqshomi” axborotida.
Gazeta axborotida lavozimidan ozod etilgan mutasaddilar o‘rniga kimlar tayinlangani haqida axborot berilmagan. Toshkent shahar hokimligining tegishli sahifasida va Mirzo Ulug‘bek tumani hokimligi saytida hali ham Shomansur Ahmedov tuman hokimi sifatida ko‘rsatilgan.
Ma’lumot uchun, mutaxassisligi bo‘yicha muhandis-elektrik bo‘lgan Shomansur Ahmedov (1966-yilda tug‘ilgan) tuman hokimi etib tayinlanguniga qadar Mirzo Ulug‘bek tumani hokimining kommunal xo‘jalikni rivojlantirish, kommunikatsiyalar va obodonlashtirish masalalari bo‘yicha birinchi o‘rinbosari (2012—2013-yillarda), “Toshshaharnur” davlat unitar korxonasi direktorining o‘rinbosari (2005—2006) va birinchi o‘rinbosari (2006—2012) lavozimlarida ishlagan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)