Samsung kompaniyasi “aqlli” uzuk ishlab chiqishi mumkin

Koreya intellektual mulk muassasasi Samsung kompaniyasining yangi qurilma — “aqlli” uzuk uchun patent talabnomasini oshkor etdi, deb yozadi 3DNews.

E’lon qilingan rasmlardan ma’lum bo‘lishicha, qurilma tovush balandligini boshqarish va smartfonga bo‘layotgan qo‘ng‘iroqlarni qabul qilish/rad etish tugmalariga ega bo‘ladi. Smart-uzukka xotira kartasi uchun slot o‘rnatilishi ham istisno qilinmagan.

Internetdagi manbalar Samsung taqiluvchi gadjetni qator sensorlar bilan jihozlashni rejalashtirayotganini ma’lum qildi. Xususan, yurak qisqarishlari tezligi va organizmning boshqa ko‘rsatkichlarini o‘lchash imkoniyati bo‘lishi mumkin, ya‘ni yangi qurilma fitnes-treker funksiyasini bajara oladi.

Loyihalashtirilayotgan buyum haqida batafsil ma’lumot hozircha oshkor qilinmayapti. Uning bozorga qachon chiqarilishi ham noma’lum.