Ispaniyaning “Barselona” klubi navbatdagi xaridni amalga oshirib, “Valensiya” a’zosi Pako Alkaserni o‘z safiga qo‘shib oldi. Bu boradagi xabar “Barselona” rasmiy saytida e’lon qilindi.
Alkaserning transfer narxi 30 million yevroni tashkil qildi. Uning yangi klubdagi badal puli esa 100 million yevro qilib belgilandi.
Pako Alkaser “Barselona” bilan shartnomaga imzo chekkan kuni o‘zining 23 yoshini qarshi olgandi.
“Valensiya” klubi murabbiylar shtabi jamoa sardori hisoblangan Pako Alkaserni qo‘yib yuborishni istamagandi, biroq uning o‘zi “Barselona”da to‘p tepish istagini bildirdi.
“Ko‘rshapalaklar” muxlislarining bunga munosabati o‘zini uzoq kuttirmadi. Ulardan biri Alkaser ismi yozilgan futbolkani yoqib yubordi.
“Valensiya” Alkaserni “Barselona”ga sotib, evaziga Munir El-Xaddadini ijaraga olgani aytilgan.
Ma’lumot uchun, Pako Alkaser o‘tgan mavsum “Valensiya”ning La Ligadagi 34 ta o‘yinida ishtirok etib, 13 ta gol urgan va 6 ta golli uzatmani amalga oshirgandi.
Izoh (0)