Rio—2016: O‘zbekiston delegatsiyasi 2 ta bronza medali bilan umumjamoa hisobida 56-o‘rinda

Rio-de-Janeyro Olimpiadasining 13-avgust holatiga ko‘ra O‘zbekiston delegatsiyasi 56-o‘rindan joy olgan.

Terma jamoa hozirga qadar 2 ta bronza medalini qo‘lga kiritdi: Diyorbek O‘rozboyev (dzyudo) va Rishod Sobirov (dzyudo).

Bu hali hammasi emas. Qo‘lga kiritilmagan bo‘lsa-da, yana 2 ta medal masalasi allaqachon hal etilgan. Bokschi Hasanboy Do‘stmatovda minimum kumush, Rustam To‘laganovda esa minimum bronza medali bor. Har ikki sportchi maksimum natija uchun kurashda davom etmoqda.

Umumjamoa hisobida AQSh terma jamoasi 20 ta oltin, 13 ta kumush va 17 ta bronza bilan peshqadam bo‘lib turibdi. Xitoy 13 ta oltin medal bilan ikkinchi bo‘lsa, Buyuk Britaniya va Janubiy Koreyada 7 tadan oltin bor.

Olimpiadadan oldin bir qator sportchilarini yo‘qotgan Rossiya terma jamoasi 5 ta oltin, 9 ta kumush va 8 ta bronza medal bilan 7-pog‘ronada qayd etilgan.

Qozog‘istonlik sportchilar 2 ta oltin, 2 ta kumush va 3 ta bronza medallariga ega chiqib, ro‘yxatda 14-o‘rindan joy olgan.