Stanislav Cherchesov futbol bo‘yicha Rossiya terma jamoasiga bosh murabbiy etib tayinlandi

Rossiyalik futbol mutaxassisi Stanislav Cherchesov mamlakat terma jamoasi bosh murabbiyi etib tayinlandi. Bu haqda “Chempionat” xabar bermoqda.

52 yoshli murabbiyning so‘nggi ish joyi Polshaning “Legiya” klubi bo‘lgandi. Uning qo‘li ostida jamoa 2015/16-yilgi mavsumda Polsha chempioni bo‘ldi va mamlakat Kubogini qo‘lga kiritdi.

Stanislav Cherchesov faoliyati davomida Avstriyaning “Kufshtayn” (2004) va “Vakker-Tirol” (2004–2006) klublarini, Rossiyaning “Spartak” Moskva (2007–2008), “Jemchujina-Sochi” (2010–2011), “Terek” (2011–2013), “Amkar” (2013–2014) hamda “Dinamo” Moskva (2014–2015) jamoalarini boshqargan. 2007-yilda “Spartak” Cherchesov bilan Rossiya chempionatida ikkinchi o‘rinni qo‘lga kiritgandi.

Eslatib o‘tamiz, Rossiya terma jamoasining sobiq bosh murabbiyi Leonid Slutskiy Yevro–2016 turniridagi muvaffaqiyatsizlikdan so‘ng iste’foga chiqqandi.