Microsoft rahbarlaridan biri Apple’ni eskirgan qurilmalarni sotgani uchun tanqid qildi

Microsoft kompaniyasining Surface mahsulotlarini ishlab chiqarish bo‘yicha menejeri Brayan Xoll Twitter’da Apple’dagi raqobatdoshlarini tanqid qilishga jazm etdi, deb yozadi 3DNews.

“Men Apple’ga raqiblik qilaman va uni tan olaman. Ammo ular ba’zida o‘z foydalanuvchilariga eski texnologiyalarini sotib, yaxshi xizmat ko‘rsatmaydi”, — deb yozdi u.

Uning so‘zlariga ko‘ra, Apple tanballashib, o‘z mijozlariga ma’naviy jihatdan eskirgan qurilmalarni sotmoqda.

Ushbu da’vo ma’lum darajada adolatli, deb yozadi nashr, Apple o‘zining Mac kompyuterlarini tobora kamroq yangilamoqda. Masalan, kompaniya 2012-yilda chiqarilgan 13 dyuymli MacBook Pro kompyuterini to‘rt yil-u ikki oydan buyon sotib kelmoqda.

Umuman olganda, aprel oyida yangilangan 12 dyuymli MacBook’dan tashqari, Mac oilasining barcha vakillari hozirda u yoki bu darajada eskirgan ko‘rinishga ega. Chunonchi, MacBook Pro Retina so‘nggi marta 1,5 yil avval, Mac mini esa ikki yil avval yangilangan edi.