O‘zbekistonlik sportchilar taekvondo bo‘yicha jahon chempionatida beshta mukofotni qo‘lga kiritdi
Buyuk Britaniyada o‘tgan taekvondo bo‘yicha jahon chempionatida O‘zbekiston sharafini himoya qilgan yosh sportchilar 3-avgust kuni Toshkentga mukofotlar bilan qaytdi. Bu haqda “Gazeta.uz” xabar bermoqda.
O‘zbekiston an’anaviy taekvondo federatsiyasi murabbiyi Shuhrat Xo‘jayevning ma’lum qilishicha, Brayton arenasida yetti o‘zbekistonlik sportchi bo‘ldi. Qizlar orasida Yekaterina Mo‘minova sparringda oltin medalni qo‘lga kiritdi. O‘g‘il bolalar orasida Jahongir Rashidov ikkinchi o‘rinni egalladi. Sportchilar 16–17 yosh kategoriyasi va 50 kilogramm vazn toifasida ishtirok etdi.
70 kilogramm vazn toifasida O‘tkir Ibodov kumush medalni qo‘lga kiritdi. Maxsus texnika va sparringda Maftunabonu Nuritdinova va Asadbek Ibrohim bronza mukofotlarga ega bo‘ldi.
Jahon chempionatida jami 45 mamlakatdan tashrif buyurgan mingdan ortiq sportchi qatnashdi.
