Rossiya olimpiya qo‘mitasi CAS qarori haqida: endi sport olami yangi qonunlarga ko‘ra yashaydi
Rossiya olimpiya qo‘mitasi Sport arbitraj sudining (CAS) qarori yuzasidan rasmiy bayonot berdi. Bu haqda “Sport Ekspress” xabar qilmoqda.
Bayonotda ta’kidlanishicha, ushbu qaror bilan “toza” futbolchilarning huquqlarini poymol qiluvchi xavfli pretsedent yaratildi.
“Endi sport olami yangi qonunlarga ko‘ra yashaydi”, — deyiladi hujjatda.
Shuningdek, Rossiya olimpiya qo‘mitasi Xalqaro Olimpiya qo‘mitasini doping janjaliga aloqador bo‘lmagan rossiyalik sportchilarning Olimpiadada ishtirok etishi yuzasidan xolis qaror qabul qilishga chaqirdi. Eslatib o‘tamiz, bu boradagi qaror 24-iyul kuni e’lon qilinadi.
Bugun, 21-iyul kuni CAS Rossiya Olimpiya qo‘mitasining va 68 nafar rossiyalik yengil atletning apellyatsiyasini rad etdi. Ular Xalqaro yengil atletika federatsiyalari uyushmasining (IAAF) rossiyalik sportchilarning Olimpiya o‘yinlarida ishtirok etishiga qo‘ygan taqiqini qayta ko‘rib chiqishni so‘ragan edi. Shu tariqa, rossiyalik yengil atletlar Rio-de-Janeyrodagi Olimpiya o‘yinlarida ishtirok etmaydigan bo‘ldi. Faqatgina Darya Klishina va Yuliya Stepanova bundan mustasno — IAAF ilgariroq ularning ishtirokiga ruxsat bergan edi.
