BMT Xavfsizlik kengashi 21-iyul, payshanba kuni tashkilotning yangi bosh kotibini saylash doirasida dastlabki ovoz berish jarayonini o‘tkazadi, deb xabar bermoqda “TASS”.
Inglizcha Straw poll, ya’ni, “cho‘pni tortish” deb nom olgan ushbu ovoz berish jarayonining maqsadi bosh kotib lavozimiga da’vogarlar sonini kamaytirishdan iborat. Ayni damda ularning soni 12 kishini tashkil qilmoqda.
BMT bosh kotibiga nomzodlar: YuNESKO bosh direktori Irina Bokova (Bolgariya), BMT rivojlantirish dasturi ma’muri Xelen Klark (Yangi Zelandiya), Argentina TIV rahbari Susana Malkorra, Slovakiya TIV rahbari Miroslav Laychak, Chernogoriya TIV rahbari Igor Lukshich, Sloveniyaning sobiq prezidenti Danilo Tyurk, Portugaliya sobiq bosh vaziri Antoniu Guterrish, Makedoniya TIV sobiq rahbari Srjan Kerim, Moldaviya TIV sobiq rahbari Natalya German, Serbiya TIV sobiq rahbari Vuk Yeremich va Xorvatiya TIV sobiq rahbari Vesna Pusich. Shuningdek, 6-iyungacha iqlim o‘zgarishi bo‘yicha BMTning Ramkaviy konvensiyasi ijrochi kotibi lavozimida ishlagan Kosta-rikalik Kristiana Figeres BMT bosh kotibligiga da’vogarlik qiladi.
Ma’lum qilinishicha, ovoz berish jarayoni Nyu-York vaqti bilan 10:00 (Toshkent vaqti bilan 19:00)da boshlanadi va u yopiq eshiklar ortida o‘tkaziladi. Natijalar haqida e’lon qilinmaydi.
BMTning yangi bosh kotibi 2017-yilning 1-yanvaridan ish boshlaydi.
Izoh (0)