БМТ Хавфсизлик кенгаши ташкилотнинг янги бош котиби номзодлари ўртасида дастлабки овоз бериш жараёнини ўтказади

БМТ Хавфсизлик кенгаши 21 июль, пайшанба куни ташкилотнинг янги бош котибини сайлаш доирасида дастлабки овоз бериш жараёнини ўтказади, деб хабар бермоқда «ТАСС».

Инглизча Straw poll, яъни, «чўпни тортиш» деб ном олган ушбу овоз бериш жараёнининг мақсади бош котиб лавозимига даъвогарлар сонини камайтиришдан иборат. Айни дамда уларнинг сони 12 кишини ташкил қилмоқда.

БМТ бош котибига номзодлар: ЮНЕСКО бош директори Ирина Бокова (Болгария), БМТ ривожлантириш дастури маъмури Хелен Кларк (Янги Зеландия), Аргентина ТИВ раҳбари Сусана Малькорра, Словакия ТИВ раҳбари Мирослав Лайчак, Черногория ТИВ раҳбари Игорь Лукшич, Словениянинг собиқ президенти Данило Тюрк, Португалия собиқ бош вазири Антониу Гутерриш, Македония ТИВ собиқ раҳбари Сржан Керим, Молдавия ТИВ собиқ раҳбари Наталья Герман, Сербия ТИВ собиқ раҳбари Вук Еремич ва Хорватия ТИВ собиқ раҳбари Весна Пусич. Шунингдек, 6 июнгача иқлим ўзгариши бўйича БМТнинг Рамкавий конвенцияси ижрочи котиби лавозимида ишлаган Коста-рикалик Кристиана Фигерес БМТ бош котиблигига даъвогарлик қилади.

Маълум қилинишича, овоз бериш жараёни Нью-Йорк вақти билан 10:00 (Тошкент вақти билан 19:00)да бошланади ва у ёпиқ эшиклар ортида ўтказилади. Натижалар ҳақида эълон қилинмайди.

БМТнинг янги бош котиби 2017 йилнинг 1 январидан иш бошлайди.