Xonanda Jahongir Otajonov 3—5-iyun kunlari Toshkentdagi “Istiqlol” san’at saroyida “Ishtiboh” deb nomlangan konsert dasturini taqdim etdi. Dasturning birinchi ikki kunida mehmon bo‘lgan jurnalist Feruz Muhammad konsert haqidagi fikrlari bilan o‘rtoqlashdi.
Konsert so‘zlari O‘zbekiston xalq shoiri Omon Matchon qalamiga mansub “Ishtiboh” nomli qo‘shiq bilan boshlandi. Xonanda qo‘shiqning deyarli yarmini muxlislarga ko‘rinish bermay kuyladi. Tomoshabinlar Jahongir Otajonovni saroyning har burchagidan izlayotganida, u kutilmaganda parda orqasidan chiqib keldi.
Mahtumquli ijodiga mansub “O‘tib boradur” qo‘shig‘ining boshlanishi she’riy shaklda bo‘ldi, so‘ng qo‘shiq qilib aytildi, yakuni esa yana she’r ko‘rinishini oldi. Yangi qo‘shiqlar orasida “Jinning ixtirosi”, “Muhabbat oliyjanob” taronalari muxlislarga ayniqsa xush kelganini qayd etish joiz.
San’atda “bir aktyor teatri” degan tushuncha mavjud — unda barcha rol bir aktyor tomonidan bajariladi. Xonandaning “Jinning ixtirosi” deb nomlangan qo‘shig‘i, bu qo‘shiqqa yondashuvi ham xuddi shunday bir aktyor teatriga mos keladi. Jahongir Otajonov har bir obrazni yo o‘zi bilib, yoki bilmasdan, qo‘shiq kuylab turgani holda o‘zi gavdalantirdi.
Muxlislardan biri Jahongir Otajonovga uning 2014-yilgi konserti vaqtida “Ey ona tuproq” nomli qo‘shig‘ini kuylayotgandagi holati aks etgan haykalchani sovg‘a qildi. Xonanda haykalchadan ham unumli foydalandi — uni sahna o‘rtasiga qo‘ydi-yu, o‘zi parda ortiga ravona bo‘ldi. Shu vaqt “Oq bulutlar” nomli qo‘shiq yangray boshladi, qo‘shiqni xuddi haykalcha kuylayotgandek tasavvur hosil bo‘ldi.
Jahongir Otajonov avvalgi konsertlaridan so‘ng xit darajasiga ko‘tarilgan “Qizg‘aldog‘im”, “Men o‘zimni sevaman”, “Yolg‘onchi yor” kabi qo‘shiqlarini muxlislar bilan birga, ular bilan jo‘rlikda kuyladi. “Ayol makri” hamda “Bevafo” qo‘shiqlari ham, muxlislarning qat’iy talabi bilan, a’lo darajada ijro etildi.
Bugungi konsertlarda sahnadagi xonandani muxlislardan “qo‘riqlash” urf bo‘lgan. Jahongir Otajonovning konsertida ham bir qo‘riqchi xonandani muhofaza qilishga uringanida, konsert egasi: “Iltimos, muxlislarga qo‘pol muomala qilmang, meni bu yerda 4200 nafar qo‘riqchim bor”, dedi-yu, muxlislarning davomiy qarsaklari ostida qolib ketdi.
Konsertning uch kuni uch xil o‘tdi — birida qo‘yilgan qo‘shiqlar boshqasida, birida qilingan harakatlar ikkinchisida takrorlanmadi. Unda boshlovchi yoki qiziqchi degan narsalar ham bo‘lmadi, hammasini Jahongir Otajonovning o‘zi zo‘r amalladi — boshlovchilik ham qildi, qiziqchilik ham; ham kuyladi, ham kuldirdi. Konsertda bittayu bitta raqqosa — Muborakxon xirom ayladi.
“Bu yil konsert berish niyatimiz yo‘q edi, ammo tushgan takliflarni rad etmasdan, konsert o‘tkazishga harakat qildik. Xush kelibsiz, bizning kutilmaganda, chala-chulpa, shoshilinchda tashkil etilgan konsert dasturimizga!”. Jahongir Otajonov o‘z konsertini shunday kirish so‘zi bilan boshlagan edi. Agar konsertning chalasi shunday bo‘lsa, puxta tayyorgarlik ko‘rsa nima bo‘lardi? Xonandaning 2016-yilgi konserti uzoq vaqt davomida tildan tushmasligiga va Jahongir Otajonov keyingi konsertida o‘z muxlislarini hayratlantirishda davom etishiga ishonsa bo‘ladi.
Feruz Muhammad,“Daryo” uchun maxsus
Izoh (0)