Garri Potter haqidagi asarlar turkumi muallifi, britaniyalik yozuvchi Joan Rouling ijodining millionlab muxlislari qahramon ulg‘aygandan so‘ng qanday qiyofaga kirgani haqidagi savolga javob oldi. Internetda Londondagi “Palas” teatrida 7-iyun kuni dastlabki ko‘rigi o‘tkazilishi mo‘ljallangan “Garri Potter va la’natlangan bola” nomli spektakl qahramonlari fotolari paydo bo‘ldi. Bu haqda “TASS” xabar bermoqda.
30-iyulda premyerasi bo‘lib o‘tadigan spektakl Rouling, yozuvchi Jek Torn va sahnalashtiruvchi rejissor Jon Tiffani tomonidan yaratilgan bo‘lib, unda “Garri Potter va o‘lim hadyalari” nomli oxirgi kitobda yoritilganidan 19 yil o‘tib yuz bergan hodisalar haqida hikoya qilinadi. Bosh qahramon mazkur yillar davomida uch farzandning otasiga aylanadi va afsungarlik vazirligida mehnat qiladi.
Spektakl saytida joylashtirilgan fotoda aktyor Jeymi Parker ijrosidagi Garri Potter xotini Jinni (aktrisa Poppi Miller) va kichik o‘g‘li Albus Severus (Sem Klemmett) qurshovida namoyon bo‘ladi.
“Endi u Garri. Unga boqib yengil tin olish mumkin, u barchasini biz istagandek bajaryapti”, — deya izoh berdi Rouling 36 yoshli Jeymi Parker ijrosidagi afsungarga. Spektakl Garri Potter haqidagi turkumning sakkizinchi, pyesa tarzida chiqarilgan esa birinchi qismi bo‘ladi.
Izoh (0)