Fransiya poytaxtida o‘n nafar bola va katta yoshli kishi chaqmoq zarbidan jabrlandi

O‘n nafar bola va katta yoshli kishi Parijda 28-may, shanba kuni chaqmoq zarbidan jabrlandi. Hodisa Fransiya poytaxtining shimoli-g‘arbiy qismida joylashgan Monso bog‘ida ro‘y berdi, deb xabar beradi “TASS”.

Olti nafar bola o‘ta og‘ir holatda kasalxonaga yetkazilgan. Momaqaldiroq bolalar bog‘da ota-onasi bilan tug‘ilgan kunni nishonlayotganda boshlangani bildirilmoqda. Parijda momaqaldiroq uzoqqa cho‘zilmagan, biroq juda kuchli bo‘lgan. Aholi bu haqda oldindan ogohlantirilgan.

Momaqaldiroq do‘l aralashgan holda butun mamlakat bo‘ylab uch kundan beri davom etmoqda. Fransiyaning Shveysariya bilan chegarasi yaqinidagi tumanlardan birida 1500 dan ziyod chaqmoq zarbi qayd etilgan.