AQShning Virginiya shtatida dizaynerlik sumkalarini xarid qilib, ularning qalbaki nusxalarini qayta sotish usulini ishlab chiqqan ayol qamoqqa olindi. Bu haqda “Interfaks” xabar bermoqda.
Bir necha yil mobaynida Prepicha Smatsorabud Gucci, Burberry, Fendi va boshqa taniqli brendlarning sumkalarini yirik do‘konlar saytlaridan onlayn sotib olgan, ularning narxi donasi uchun 2000 dollardan oshiq bo‘lgan. Biroq oradan biroz o‘tib, ayol do‘konga shaxsan o‘zi kelib, mahsulotni qaytarib bergan. Faqat aslini emas, Xitoyda ishlab chiqarilgan qalbaki nusxasini.
Smatsorabud shu tariqa 12 shtatni aylanib chiqqan. Usul shunchalik yaxshi o‘ylab topilgandiki, o‘z vaqtida ayol butun dunyodagi onlayn-do‘konlarning eng hurmatli mijozi edi.
Ayol do‘konda qalbaki sumkalar uchun pul olib, asl nusxalarni Instagram yoki eBay orqali sotuvga qo‘ygan. Shu tariqa u bir do‘konlar tarmog‘ining o‘zidan 1 million dollardan ziyod mablag‘ ishlab topishga muvaffaq bo‘lgan. Bunda hali haqiqiy sumkalarni onlayn sotishdan olingan “daromad” hisobga olinmagan.
Hibsga olish chog‘ida Tailandda tug‘ilib-o‘sgan ayolning uyidan 572 dona sumka topilgan va ularning aksariyati qalbaki bo‘lgan. Firibgarligi uchun unga 20 yilgacha qamoq jazosi berilishi mumkin.
Izoh (0)