UZ24 nashri tahririyatga Ukrainadagi Kazatin shahrining muzeyi direktori nomidan xat kelganligi haqida xabar bermoqda. Unda muzey xodimlari tomonidan 1941—1945-yillardagi urushda halok bo‘lgan o‘zbekistonlik askarning jasadi qoldiqlari topilganligi ma’lum qilingan.
O‘zbekistonlik askar 1943—1944-yillarda Ukrainaning Vinnitsa viloyatini fashist okkupantlaridan ozod qilish vaqtida halok bo‘lgan.
Muzey direktori Liliya Makarevichning so‘zlariga ko‘ra, askar 1921 yoki 1922-yilda Qashqadaryo viloyati Kitob tumanida tug‘ilgan, ismi Muso yoki Musollo Qo‘ziyev bo‘lgan. Afsuski, askar halok bo‘lgan joydan topilgan hujjatlarida ism-familiyasini aniq o‘qishning iloji bo‘lmagan.
Askar taxminan 1940-yillarda chaqirilgan. Muzey direktori askarning dafn etilgan joyi haqida xabar berish uchun uning yaqinlarini izlab topishga yordam berishni so‘ragan.
UZ24 muxbiri Toshkentdagi Xotira maydoniga borib, Ikkinchi jahon urushida halok bo‘lganlar ro‘yxatidan askarning ism-familiyasiga mos keladigan nomlarni qidirib topdi.
Izoh (0)