Avval xabar berganimizdek, Farg‘onada 26-may kuni oliy ta’lim muassasalari talabalari o‘rtasida “Universiada – 2016” respublika sport o‘yinlari boshlandi. Ochilish marosimida O‘zbekiston Respublikasi Prezidenti Islom Karimovning “Universiada – 2016” sport o‘yinlari ishtirokchilariga tabrigini Prezidentning Davlat maslahatchisi X.Sultonov o‘qib eshittirdi, deb yozadi O‘zA.
“Saralash bosqichlarida ishtirok etgan 165 mingdan ziyod o‘g‘il-qizlarimiz orasidan faqat 900 nafar qatnashchiga bunday yuksak baxt nasib etgani bu bellashuvlarning naqadar keskin va murosasiz o‘tganidan, sizlarning tinimsiz kurash, baquvvat iroda va mahorat hisobidan bugungi marralarga yetib kelganingizdan dalolat beradi”, — deyiladi unda.
Prezident ta’kidlashicha, keyingi o‘n yilda Bolalar sportini rivojlantirish jamg‘armasining 744 milliard so‘mlik mablag‘i hisobidan barcha viloyat, shahar va qishloqlarda 1 ming 700 dan ziyod zamonaviy sport inshootlari bunyod etildi.
Mamlakatda oxirgi o‘n yil davomida sport bilan muntazam shug‘ullanish darajasi bolalar va o‘smirlar o‘rtasida 30 foizdan 57 foizga, qiz bolalar o‘rtasida 24 foizdan 47 foizga yetdi, 2005-yilda bolalar sportning 43 ta turi bilan shug‘ullangan bo‘lsa, bugungi kunda bu raqam 59 tani tashkil etmoqda.
“Bu yilgi Universiada musobaqalarida olimpiya o‘yinlari dasturiga kiritilgan boks, erkin kurash, yunon-rum kurashi, taekvondo, og‘ir atletika kabi beshta sport turi bo‘yicha bellashuvlar bo‘lib o‘tishi, tabiiyki, bu o‘yinlarning nufuzi va ahamiyatini yanada oshiradi”, — deya qayd etdi Islom Karimov.
“Avvalo, o‘ziga talabchanlikni oshirish, qat’iy intizomga rioya qilish, o‘z oldiga qo‘ygan maqsadlarga erishish uchun bor kuch-g‘ayratini ishga solish, hayotda kurashchi bo‘lib yashash, mardlik va matonat kabi xususiyat va alomatlarni faqat sportga yoshlikdan ixlos qo‘yib, uning sir-asrorlarini chuqur o‘rganish, mashaqqatli mashqlarda toblanish orqali tarbiyalash mumkinligini hech qachon unutmasligimizni istardim”, — dedi davlat rahbari.
Prezident: “Barchangizni bag‘rimga bosib, bugungi yoshlik va sport bayrami bilan yana bir bor chin yurakdan qutlar ekanman, sizlarga sihat-salomatlik, baxtu saodat va zafarlar tilayman”, — deya o‘z murojaatini yakunladi.
Izoh (0)