Mavsumdagi beshta turnirning to‘rttasida muvaffaqiyatsiz ishtirok etgan “Manchester Yunayted” klubi Angliya Kubogi finalida zafar quchdi. Londondagi “Uembli” stadionida kechgan finalda Lui Van Gal shogirdlari “Kristal Pelas” ustidan irodali g‘alabaga erishdi.
Uchrshuvning 78-daqiqasiga kelib Jeyson Panchon londonliklarni hisobda oldinga olib chiqqan bo‘lsa, oradan uch daqiqa o‘tib Xuan Mata muvozanatni tikladi. Asosiy vaqtda boshqa gol kiritilmagach, bosh hakam Mark Klattenburg 15 daqiqadan ikkita qo‘shimcha taym belgiladi.
105-daqiqaga kelib “MYu” futbolchilari maydonda bir kishi kam bo‘lib qoldi. Angliya Premyer-ligasida kuchli to‘rtlikka kira olmay, Chempionlar Ligasidan chiqib ketgan jamoa himoyachisi Kris Smolling maydondan chetlatildi.
Shunga qaramay, “Yunayted” besh daqiqadan keyin g‘alaba golini kiritdi. Lingardning goliga “Kristal Pelas” futbolchilari javob bera olmadi. Angliya Premyer-ligasi, Angliya Liga Kubogi, Yevropa Chempionlar Ligasi va Yevropa Ligasidagi muvaffaqiyatsizliklardan keyin “Manchester Yunayted” Angliya Kubogini qo‘lga kiritdi.
Angliya Kubogi FINAL 21-may, shanba
Izoh (0)