“Toshkent” aeroportida yangi biznes-zal foydalanishga topshirildi (foto)

“Toshkent” xalqaro aeroportida Business Lounge Uzbekistan Airways biznes-zali rekonstruksiyadan keyin foydalanishga topshirildi. Yuqori qulaylik darajasiga ega zal “O‘zbekiston havo yo‘llari” va boshqa aviakompaniyalarning biznes-klassi yo‘lovchilariga xizmat ko‘rsatadi, deb xabar beradi UzDaily.

Yangi biznes-zal dizaynini ishlab chiqishda eng zamonaviy me’morchilik tendensiyalari va texnologiyalari inobatga olindi. Jumladan, yo‘lovchilarni ro‘yxatga olish va yuk bilan ishlash uchun jahon standartlariga javob beradigan zamonaviy texnik va texnologik uskunalar o‘rnatildi.

350 kvadrat metr maydonga va 160 o‘ringa ega kutish zalida onalar va bolalar xonasi, o‘yin zonasi, dush kabinalari, tibbiyot punkti, kafe-bar, Duty free bojsiz savdo do‘konlari ishlaydi.

Zal qulay mebel, keng formatli teleekranlar, gazeta-jurnallar va bepul Wi-Fi bilan ta’minlangan. Shuningdek, jismoniy imkoniyatlari cheklangan shaxslarga maxsus xizmat ko‘rsatish tashkil etilgan.