Joriy yilning 25-martidan 2-apreliga qadar Xitoyning Sian An shahrida boks bo‘yicha Rio–2016 Olimpiada o‘yinlari yo‘llanmalari uchun Osiyo va Okeaniya mintaqalarining qo‘shma litsenzion turniri bo‘lib o‘tdi. Unda 7 nafar o‘zbekistonlik bokschi ishtirok etib, 5 ta oltin va 2 ta kumush medalini qo‘lga kiritdi hamda umumjamoa hisobida birinchi o‘rinni egalladi, deb xabar beradi O‘zA.
Nufuzli musobaqada O‘zbekiston sharafini himoya qilgan sportchilar orasida Yodgoroy Mirzayeva kumush medalni va eng asosiysi Rio–2016 Olimpiada o‘yinlariga yo‘llanmani qo‘lga kiritib, O‘zbekiston xotin-qizlari orasida boks bo‘yicha Olimpiada o‘yinlarining yo‘llanmasini qo‘lga kiritgan birinchi sportchi sifatida qayd etildi.
“Qizim bolaligidan sportga mehr qo‘ydi. Qizlarga xos bo‘lmagan sport turi – boksga ishtiyoqi balandligidan avvaliga xavotirga tushdik. Ammo musobaqalarda yuqori natijalarga erishib, murabbiylarining unga ishonchi ortgani tufayli qo‘llab-quvvatladik. Shu tarzda u O‘zbekiston birinchiliklari, xalqaro turnirlar, Osiyo chempionatida muvaffaqiyatli qatnashdi. Bir necha bor chempion bo‘ldi. Uning Olimpiada o‘yinlarida ishtirok etish huquqini qo‘lga kiritgani oilamizdan tashqari, viloyatimiz, mamlakatimiz uchun ham quvonchli voqea bo‘lganini yuragimdan his etyapman”, – deydi Yodgoroy Mirzayevaning onasi Vazira Normurodova.
Qayd etish joiz, Yodgorov Mirzayeva 2015-yili Xitoyning Ulanchab shahrida o‘tkazilgan Osiyo chempionatida bronza medaliga sazovor bo‘lgan edi.
Ma’lumot uchun, Yodgoroy Mirzayeva 1996-yilning 22-aprel kuni, Samarqand viloyatining Kattaqo‘rg‘on tumanida tavallud topgan.