Eronning “Traktorsozi” klubi o‘z muxlislarining qo‘llab-quvvatlovi sababli futbol bo‘yicha Osiyo Chempionlar Ligasi guruh bosqichi 4-turida “Paxtakor”ni mag‘lub etdi. Bu haqda, OFK rasmiy sayti xabariga ko‘ra, “Traktorsozi” bosh murabbiyi Amir G‘alioniy aytib o‘tgan.
Eslatib o‘tamiz, 6-aprel kuni OChL guruh bosqichi 4-tur bahslari doirasida Toshkentning “Paxtakor” jamoasi Eronda “Traktorsozi” klubi mehmoni bo‘ldi. O‘yin 2:0 hisobida eronliklar foydasiga hal bo‘ldi.
“Ishqibozlarimiz bizni ajoyib tarzda qo‘llab-quvvatlab turganliklari sababli “Paxtakor”ni mag‘lubiyatga uchratdik. Ikkinchi bo‘limda Surush Rofeiyni maydonga tushirganimizdan so‘ng, o‘yinimiz yanada ochildi”, — dedi “Traktorsozi” bosh murabbiyi.
“Biz ‘Paxtakor’ga birorta ham imkoniyat bermadik. Hozir hisobimizda 9 ochko bor va keyingi bosqich chiqish masalasini 90 foizga hal qilib bo‘ldik. Futbolchilarimiz bugun ajoyib o‘yin ko‘rsatishdi”, — deya qo‘shimcha qildi Amir G‘alinoiy.
Izoh (0)