Osiyo Futbol Konfederatsiyasi (OFK) Eron va Saudiya Arabistoni o‘rtasidagi munosabatlar keskinlashuvida ijobiy tomonga siljish ko‘rmaganligi uchun, Osiyo Chempionlar Ligasidagi ikki mamlakat futbol klublarining o‘zaro uchrashuvlarini betaraf maydonda o‘tkazishga qaror qildi. Bu haqda OFK rasmiy sayti xabar bermoqda.
Avvalroq, qo‘mita 2016-yilning 15-martiga qadar voqealar rivojini kuzatishini ma’lum qilib, fevral hamda mart oylaridagi o‘zaro o‘yinlarni aprel—may oylariga ko‘chirgan edi. Ikki mamlakat o‘rtasidagi munosabatlarda o‘zgarish bo‘lmagach, uchrashuvlar neytral maydonda o‘tadigan bo‘ldi.
Ma’lumot uchun, Osiyo Chempionlar Ligasining dastlabki uch guruhidan Eron va Saudiya Arabistoni jamoalari o‘rin olgan. Kelishuvga ko‘ra, bu jamoalar o‘zaro o‘yinlarni Qatar, BAA va Ummon mamlakatlarida o‘tkazadi.
Jumladan, “A” guruhi ishtirokchilari hisoblangan “Al-Ittihod” (Saudiya Arabistoni) va “Fulad Sepahon” (Eron) jamoalari 20-aprelga belgilangan 5-tur uchrashuvini Qatar poytaxti Dohada o‘tkazadi.
“B” guruhi vakillari bo‘lgan “Zob Ohan” (Eron) va “An-Nasr” (Saudiya Arabistoni) jamoalarining 5-tur o‘yini Ummon poytaxti Maskatda, 4-may sanasidagi javob to‘qnashuvi BAAning Dubay shahrida bo‘lib o‘tadi.
“C” guruhi 5-tur uchrashuvlari doirasida 19-aprelda bo‘ladigan “Al-Hilol” (Saudiya Arabistoni) — “Traktorsozi” (Eron) uchrashuvi Qatarning Doha shahrida o‘tkazilishi belgilangan. “A” va “C” guruhining 6-tur o‘yinlari qayerda bo‘lishiga yaqin kunlarda oydinlik kiritiladi.
Eslatib o‘tamiz, Saudiya Arabistoni tomonidan nufuzli shia ulamosi Nimr An-Nimrning qatl etilishi Eron va Saudiya Arabistoni o‘rtasidagi munosabatlarining keskinlashuviga sabab bo‘lgandi.
Izoh (0)