Осиё Футбол Конфедерацияси (ОФК) Эрон ва Саудия Арабистони ўртасидаги муносабатлар кескинлашувида ижобий томонга силжиш кўрмаганлиги учун, Осиё Чемпионлар Лигасидаги икки мамлакат футбол клубларининг ўзаро учрашувларини бетараф майдонда ўтказишга қарор қилди. Бу ҳақда ОФК расмий сайти хабар бермоқда.
Аввалроқ, қўмита 2016 йилнинг 15 мартига қадар воқеалар ривожини кузатишини маълум қилиб, февраль ҳамда март ойларидаги ўзаро ўйинларни апрель—май ойларига кўчирган эди. Икки мамлакат ўртасидаги муносабатларда ўзгариш бўлмагач, учрашувлар нейтрал майдонда ўтадиган бўлди.
Маълумот учун, Осиё Чемпионлар Лигасининг дастлабки уч гуруҳидан Эрон ва Саудия Арабистони жамоалари ўрин олган. Келишувга кўра, бу жамоалар ўзаро ўйинларни Қатар, БАА ва Уммон мамлакатларида ўтказади.
Жумладан, «А» гуруҳи иштирокчилари ҳисобланган «Ал-Иттиҳод» (Саудия Арабистони) ва «Фулад Сепаҳон» (Эрон) жамоалари 20 апрелга белгиланган 5-тур учрашувини Қатар пойтахти Доҳада ўтказади.
«Б» гуруҳи вакиллари бўлган «Зоб Оҳан» (Эрон) ва «Ан-Наср» (Саудия Арабистони) жамоаларининг 5-тур ўйини Уммон пойтахти Маскатда, 4 май санасидаги жавоб тўқнашуви БААнинг Дубай шаҳрида бўлиб ўтади.
«C» гуруҳи 5-тур учрашувлари доирасида 19 апрелда бўладиган «Ал-Ҳилол» (Саудия Арабистони) — «Тракторсози» (Эрон) учрашуви Қатарнинг Доҳа шаҳрида ўтказилиши белгиланган. «А» ва «C» гуруҳининг 6-тур ўйинлари қаерда бўлишига яқин кунларда ойдинлик киритилади.
Эслатиб ўтамиз, Саудия Арабистони томонидан нуфузли шиа уламоси Нимр Ан-Нимрнинг қатл этилиши Эрон ва Саудия Арабистони ўртасидаги муносабатларининг кескинлашувига сабаб бўлганди.
Изоҳ (0)