Futbol bo‘yicha O‘zbekiston milliy terma jamoasi 24-mart kuni Filippin, 29-mart kuni esa Bahrayn terma jamoasiga qarshi JCh—2018 saralash uchrashuvi doirasida maydonga tushadi. Samvel Babayan murabbiyligidagi bosh jamoa Toshkentda 17-mart kuni mashg‘ulotlarga kirishgani haqida avvalroq xabar berilgan edi.
“Championat.asia” ma’lumotiga ko‘ra, bosh murabbiy Samvel Babayan Toshkentning “Lokomotiv” klubida to‘p suradigan ikki futbolchi — Oleg Zoteyev va Sardor Mirzayevga 21-mart kuni javob berdi va ular terma jamoa qarorgohini tark etdi.
Oleg Zoteyev va Sardor Mirzayev nima uchun terma jamoa lagerini tark etganiga aniqlik kiritilmagan.
Ma’lumot uchun, yarim himoyachi Sardor Mirzayev Osiyo Chempionlar Ligasi guruh bosqichi dastlabki uch turida ikkita gol urgan ikki o‘zbekistonlik futbolchidan biri hisoblanadi. Shuningdek, u O‘zbekiston Oliy Ligasining dastlabki ikki turida ham uchta gol urdi.
Qo‘shimcha qilishlaricha, terma jamoa yig‘iniga “Nasaf” klubi darvozaboni Eldor Suyunov hamda Qozog‘istonning “Ordabasi” jamoasi hujumchisi Aleksandr Geynrix qo‘shilgan. Tez orada Odil Ahmedov, Vitaliy Denisov, Sardor Rashidov kabi legionerlar Toshkentga yetib kelishi kutilmoqda.
Avvalroq, O‘FF matbuot xizmati “Paxtakor” futbolchisi Jaloliddin Masharipov hamda “Bunyodkor” a’zosi Doston Hamdamov salomatligi borasidagi muammolar sabab terma jamoa lagerini tark etgani haqida xabar bergandi.
Doston Hamdamov ham Osiyo Chempionlar Ligasi guruh bosqichining birinchi davrasi yakuniga ko‘ra ikkita gol urgan. OChLda uchta gol urgan o‘zbekistonlik — hujumchi Igor Sergeyev terma yig‘inidagi ishtirokini davom ettirmoqda.
Izoh (0)