Футбол бўйича Ўзбекистон миллий терма жамоаси 24 март куни Филиппин, 29 март куни эса Баҳрайн терма жамоасига қарши ЖЧ—2018 саралаш учрашуви доирасида майдонга тушади. Самвел Бабаян мураббийлигидаги бош жамоа Тошкентда 17 март куни машғулотларга киришгани ҳақида аввалроқ хабар берилган эди.
«Championat.asia» маълумотига кўра, бош мураббий Самвел Бабаян Тошкентнинг «Локомотив» клубида тўп сурадиган икки футболчи — Олег Зотеев ва Сардор Мирзаевга 21 март куни жавоб берди ва улар терма жамоа қароргоҳини тарк этди.
Олег Зотеев ва Сардор Мирзаев нима учун терма жамоа лагерини тарк этганига аниқлик киритилмаган.
Маълумот учун, ярим ҳимоячи Сардор Мирзаев Осиё Чемпионлар Лигаси гуруҳ босқичи дастлабки уч турида иккита гол урган икки ўзбекистонлик футболчидан бири ҳисобланади. Шунингдек, у Ўзбекистон Олий Лигасининг дастлабки икки турида ҳам учта гол урди.
Қўшимча қилишларича, терма жамоа йиғинига «Насаф» клуби дарвозабони Элдор Суюнов ҳамда Қозоғистоннинг «Ордабаси» жамоаси ҳужумчиси Александр Гейнрих қўшилган. Тез орада Одил Аҳмедов, Виталий Денисов, Сардор Рашидов каби легионерлар Тошкентга етиб келиши кутилмоқда.
Аввалроқ, ЎФФ матбуот хизмати «Пахтакор» футболчиси Жалолиддин Машарипов ҳамда «Бунёдкор» аъзоси Достон Ҳамдамов саломатлиги борасидаги муаммолар сабаб терма жамоа лагерини тарк этгани ҳақида хабар берганди.
Достон Ҳамдамов ҳам Осиё Чемпионлар Лигаси гуруҳ босқичининг биринчи давраси якунига кўра иккита гол урган. ОЧЛда учта гол урган ўзбекистонлик — ҳужумчи Игорь Сергеев терма йиғинидаги иштирокини давом эттирмоқда.
Изоҳ (0)