Facebook’dagi “Voditeli Tashkenta” guruhida Toshkentdagi Germaniya elchixonasi yaqinidagi avtoturargoh oldida 11-mart, juma kuni yuz bergan yo‘l-transport hodisasi videoyozuvi e’lon qilindi.
Videoyozuv avtoturargohning kuzatuv kameralaridan olingan. Unda Toyota Prado avtomobili “Matonat” haykali tarafdan kelib, qarama-qarshi harakat yo‘nalishlarini ajratuvchi chiziqni bosib o‘tgani holda, avtoturargoh tomon burilishga uringani, bu vaqtda qarama-qarshi qatnov qismidan kelayotgan BMW sedani Toyota Prado’ga borib urilganini ko‘rish mumkin.
Yo‘l-transport hodisasi yuz berganidan so‘ng, BMW’dan erkak kishi tushib kelgan, atrofdagi odamlar har ikki avtomobil haydovchilariga yordamga shoshilganini ko‘rish mumkin. Ijtimoiy tarmoqlarda qoldirilgan xabarlarga ko‘ra, Toyota Prado yo‘ltanlamasi ayol haydovchining boshqaruvida bo‘lgan.
Videoxabar ostida fikr bildirganlarning aksariyati Toyota Prado burilgan nuqtada qarama-qarshi harakat yo‘nalishlari qanday chiziq bilan ajratilgani borasida tortishgan, aksariyat foydalanuvchilar qatnov qismlari sidirg‘a chiziq bilan ajratilganini ta’kidlagan.
Ayni vaqtda, ba’zi foydalanuvchilarning fikricha, yo‘lning shu qismi uzuq-uzuq chiziqlar bilan ajratilgan taqdirda ham, Toyota Prado dastlab qarama-qarshi qatnov qismidan kelayotgan avtomobillarni o‘tkazib yuborib, so‘ng harakatni davom ettirishi kerak edi.
Ma’lumot uchun, hodisa oqibatida jabrlanganlar to‘g‘rida aniq ma’lumot yo‘q. BMW’ni boshqarib borgan erkakning turmush o‘rtog‘i “Voditeli Tashkenta” guruhida eri sog‘-salomat ekani haqida xabar qoldirgan.
Izoh (0)