Amerikaning Microsoft kompaniyasi asoschisi Bill Geyts Apple kompaniyasi bilan nizoli vaziyatda AQSh federal hukumatini to‘liq qo‘llab-quvvatlayapti deb o‘ylashayotganidan xavotirda. Bu haqda tadbirkor Bloomberg agentligiga ma’lum qildi, deb yozadi “TASS”.
Shu tariqa, u Britaniyaning Financial Times gazetasi bergan ma’lumotni rad etdi. Nashr avvalroq AQSh Federal qidiruv byurosining Apple’dan San-Bernardino shahridagi (Kaliforniya shtati) teraktni sodir etgan shaxsning iPhone’ini buzib kirishni so‘rab bildirgan talabini Geyts qo‘llab-quvvatlagani haqida yozgan edi.
“Financial Times’ning maqolasi mening ushbu masala bo‘yicha nuqtai nazarimni ifodalamaydi”, — deya ta’kidladi Microsoft asoschisi.
U bunday vaziyatda huquq-tartibot organlari bilan hamkorlik qilish va foydalanuvchilar manfaatlarini himoya qilish majburiyati o‘rtasidagi to‘g‘ri muvozanatni saqlagan ma’qul deb hisoblaydi.
Avvalroq tarqalgan xabarga ko‘ra, Bill Geyts Financial Times nashriga bergan intervyusida gap terrorga qarshi kurash borasida ketganida, xususiy tashkilot va korxonalar davlatga foydalanuvchilar haqidagi ma’lumotlarni taqdim etishi lozimligini aytgan va shu tariqa, Apple’dan telefon kodini buzishda yordam talab qilgan FQBni qo‘llab-quvvatlagan edi.
Eslatib o‘tamiz, 16-fevral kuni AQSh sudi Apple korporatsiyasi Federal qidiruv byurosi xodimlariga “San-Bernardino mergani”ning telefonini buzib, undagi ma’lumotlarni olishda yordam berishi lozimligi haqida qaror qabul qildi. Sud qaroriga muvofiq, korporatsiya shu paytga qadar terrorchilardan biri Said Faruqning mobil uskunasi ma’lumotlariga buzib kira olmayotgan FQB xodimlariga maxsus dasturiy ta’minot taqdim etishi talab qilinadi. Korporatsiya rahbari Tim Kuk bunga javoban sud qaroriga rasmiy e’tiroz bildirilishini ta’kidlab o‘tdi.
Izoh (0)