Malayziya bosh prokurori Muhammad Apandi Ali mamlakat bosh vaziri Najib Razzoq shaxsiy hisobidagi yirik summani (681 million dollar) Saudiya Arabistoni qirollik oilasining xayriyasi deb topdi. Bu haqda “RIA Novosti” xabar bermoqda.
“Sud ishi yakuniga ko‘ra, ushbu pul mablag‘lari pora bo‘lib chiqmagani meni qoniqtirdi”, — dedi Ali rejalashtirilmagan matbuot anjumanida. U, shuningdek, Saudiya qirollik oilasi tomonidan amalga oshirilgan katta hajmdagi xayriya sabablarini aniqlashtirish uchun hech qanday zaruriyat ko‘rmayotganini, chunki bu ularning shaxsiy ishi ekanligini ta’kidladi.
Bundan tashqari, Ali ma’lum qilishicha, Razzoq Saudiya oilasiga hali ishlatib ulgurmagan 620 million dollarni qaytargan.
Eslatib o‘tamiz, o‘tgan yil iyulida bosh vazir Najib Razzoqning shaxsiy hisob raqamiga go‘yoki 700 million dollar o‘tkazib bergani aytilgan uchta kompaniyaga nisbatan tekshiruv boshlangan edi.
Izoh (0)