Ispaniya politsiyasi Alikante yaqinida Giant-Alpecin jamoasining olti nafar velopoygachisini urib ketgan 73 yoshli britaniyalik ayolga ehtiyotsizlik bilan mashina boshqarish aybini qo‘ymoqda. Bu haqda “TASS” xabar qilmoqda.
Hodisa 23-yanvar, shanba kuni Gollandiya jamoasining yig‘ini davomida sodir bo‘ldi. To‘qnashuv trassaning poygachilar harakatlanayotgan qismidan qarama-qarshi tomondan britaniyalikning avtomobili kelib qolgani tufayli yuzaga keldi. Avariya natijasida olti nafar sportchi jarohat oldi va shifoxonaga yotqizildi.
73 yoshli ayol harakat tomonini adashtirib qo‘ygani taxmin qilinmoqda. Chunki u Buyuk Britaniyadagi singari yo‘lning chap tomonidan harakatlangan.
Jarohatlanganlar orasida 2015-yilgi Parij — Rube poygasi g‘olibi germaniyalik Jon Degenkolb ham bor.
Izoh (0)