O‘zbekiston Ekologik harakati Toshkent shahar hududiy bo‘linmasi tomonidan Yashnobod tumani “Behizor” mahalla fuqarolar yig‘ini bilan hamkorlikda Ravshan Ermatov bilan mahalla aholisi o‘rtasida uchrashuv tashkil qilindi. Bu haqda UzReport xabar qilmoqda.
Tadbirda O‘zbekiston ekologik harakati xodimlari, mahalla faollari, Yashnobod tumanidagi 230 va 198-maktab o‘quvchilari, sport ixlosmandlari va ommaviy axborot vositalari xodimlari qatnashdi.
Tadbirda Osiyoning 5 karra eng yaxshi hakami Ravshan Ermatov so‘zga chiqib, o‘zining bosib o‘tgan hayot yo‘li va sportga kirib kelgan kunidan boshlab O‘zbekistonda futbol sohasida qo‘lga kiritilgan yutuqlar, hakamlik maktabini yaratish bo‘yicha amalga oshirilayotgan chora-tadbirlar borasida so‘zlab berdi.
Uchrashuv davomida Yashnobod tumanidagi maktab o‘quvchilari va mahalla faollari Ermatovga o‘zlarini qiziqtirgan savollar bilan murojaat qildi.
7-yanvar kuni Yunusobod tumanidagi “Guliston” mahallasida ham Ravshan Ermatov bilan uchrashuv bo‘lib o‘tgandi.
Eslatib o‘tamiz, Ravshan Ermatov 2015-yil 27-dekabr kuni Globe Soccer Awards tanloviga ko‘ra, “Yil hakami” deb e’lon qilindi. 31-dekabr kuni esa O‘zbekiston Prezidenti Islom Karimov Ermatovni “Buyuk xizmatlari uchun” ordeni bilan mukofotlash to‘g‘risidagi farmonni imzoladi.
Izoh (0)