Suzish bo‘yicha Belgiyadagi turnirda O‘zbekiston terma jamoasi 6 ta medalga sazovor bo‘ldi

2016-yilning 21—25-yanvar kunlari Belgiyaning Antverpen shahrida suzish bo‘yicha xalqaro turnir o‘tkazildi. Ushbu nufuzli musobaqada O‘zbekiston terma jamoa a’zolari 3 ta oltin, 1 ta kumush va 2 ta bronza medalini qo‘lga kiritib, umumjamoa hisobida Buyuk Britaniya, Litva, Portugaliya va Belgiya davlatlaridan so‘ng 5-o‘rinni egalladi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.

O‘zbekiston terma jamoasi hisobiga oltin medallarni Vladislav Mustafin 50 va 100 metr masofalarga brass usulida suzish musobaqalarida, Ra’noxon Amanova esa 200 metrga kompleks usulda suzish bahslarida keltirdi.

Ra’noxon Amanova, shuningdek, 400 metr masofaga kompleks usulda suzish musobaqasida kumush medal sovrindori bo‘ldi.

Terma jamoaning yana bir tajribali sportchisi Aleksey Derlyugov ham bir yo‘la ikki yo‘nalishda bronza medali sovrindori bo‘ldi. U 200 va 400 metrga kompleks usulda suzish musobaqalarida 3-o‘rinni oldi.