O‘z ijtimoiy tarmog‘idagi sahifasida o‘zbekistonlik ishqibozlarni haqorat qilgan O‘zbekiston olimpiya terma jamoasi himoyachisi Maksimilian Fomin qilgan ishi uchun kechirim so‘radi.
Fomin Iroqqa qarshi o‘yindan keyin uni va olimpiya termasini ijtimoiy tarmoqlar orqali tanqid qilganlarga nisbatan keskin javob qaytargandi. Ammo oradan ma’lum bir vaqt o‘tgach, olimpiya termasi himoyachisi uning aytgan so‘zlari barcha muxlislarga atalmaganini tushuntirdi. Himoyachi Facebook sahifasidagi postini rus va o‘zbek tillarida qoldirdi.
“Hurmatli futbol muxlislari, mening postim bizning ashaddiy muxlislarimizga, ya’ni bizga chin ko‘ngildan muxlislik qilganlarga tegishli emas. Biz sizlarga chin ko‘ngildan minatdorchilik bildiramiz va siz kutgan natijaga erisha olmadik, biz xuddi sizlar kabi bizning jannatmakon O‘zbekistonimiz olimpiya o‘yinlariga yo‘llanma olishini xohlagandik. Afsuski, bu amalga oshmadi. Men yana bir marotaba takrorlayman bu sport, bu o‘yin va bu erda har doim ham biz xohlagandek bo‘lmaydi! Men chil dildan haqiqiy muxlislarimizdan uzr so‘rayman. Men sizlarni xafa qilishni xohlamagandim. Mening postim bizni noto‘g‘ri gaplar bilan haqorat qilgan va haligacha kommentariyalarda bizni yomonlayotganlarga tegishli!”, — deb yozdi Maksimilian Fomin.
Eslatib o‘tamiz, O‘zbekiston olimpiya terma jamoasi Rio—2016 yo‘llanmasi uchun kurashdan chetda qolib ketdi.
Izoh (0)