Bugun, 17-yanvar kuni “Kitob olami” markazida O‘zbekiston xalq yozuvchisi Tohir Malikning “Mehmon tuyg‘ular”, “Falak” va “Zulmat saltanati” kitoblarining taqdimoti bo‘lib o‘tdi. Yozuvchi o‘zbekistonlik futbolchilar haqida ham fikr bildirdi. Uning so‘zlarini “Ziyouz.uz” asoschisi, jurnalist Davronbek Tojialiyev Facebook’dagi sahifasida keltirib o‘tdi.
“Messi, Ronaldu degan futbolchilarning maydondagi har bir xatti-harakatini kompyuter hisoblab boradi. Ular bitta o‘yinda 15—16 kilometr yugurarkan. Tinimsiz mehnat qiladi. Shuncha yugurganiga yarasha, natijasi ham yaxshi bo‘ladi.
Bizning dumbul futbolchilarimizning eng yaxshisi ham 5 kilometr zo‘rg‘a yuguradi. Shunga yarasha natijani ham ko‘raverasizlar. Kecha ham yutqizishdi-ku. Ularning hammasining bo‘yniga omoch boylab, dalada qo‘sh haydatish kerak. Sizlar shular kabi tanbal bo‘lib qolmanglar!”, — dedi Tohir Malik.
Eslatib o‘tamiz, O‘zbekiston olimpiya terma jamoasi qit’a chempionatining 2-turida Iroqqa imkoniyatni boy berganidan keyin Olimpiada yo‘llanmalari uchun kurashdan chetga chiqdi.
Izoh (0)