Toshkentdagi Inha universiteti matematika o‘qituvchilari o‘rtasidagi tanlov g‘oliblarini taqdirladi

Toshkentdagi Inha universiteti maktab, litsey va kollejlar o‘qituvchilari o‘rtasida o‘tkazilgan tanlov natijalarini e’lon qildi, deb yozadi UzDaily.

Tanlov shartlariga ko‘ra, matematika o‘qituvchilari universitet professorlari tomonidan ingliz tilida tayyorlangan masalalarni yechishi kerak edi. O‘qituvchilarning ishini universitetning janubiy koreyalik mutaxassislari baholadi.

Tanlovda birinchi o‘rinni Toshkentdagi Vestminster universiteti qoshidagi akademik litsey o‘qituvchisi Yelizaveta An, ikkinchilikni Jahon iqtisodiyoti va diplomatiya universiteti qoshidagi akademik litsey o‘qituvchisi Sardorbek Pirnapasov, uchinchi o‘rinni esa Qashqadaryo viloyati Kitob tumanidagi 3-sonli akademik litsey o‘qituvchisi Oybek Sharopov egalladi. Ular tegishli ravishda planshet, smartfon va tashqi qattiq disk sovrindorlari bo‘ldi.

Ushbu tanlov Toshkentdagi Inha universitetida 2016-yil 6—8-yanvar kunlari “Qiziqarli matematika” birinchi matematika festivali doirasida o‘tkazildi.