Janubiy Koreya olimpiya termasi O‘zbekistonga qarshi o‘yinga sirpanchiq maydonda tayyorgarlik ko‘rmoqda

Futbol bo‘yicha Janubiy Koreya olimpiya terma jamoasi bosh murabbiyi Shin Te Yong yanvar oyida Qatarda o‘tadigan Osiyo chempionatining ilk bahsida ro‘baro‘ keladigan O‘zbekistonni guruhdagi eng xavfli raqib, deb hisoblamoqda. Bu haqda “Stadion.uz” ma’lum qildi.

“Bosh murabbiy Shin Te Yong guruhdagi ilk raqib — O‘zbekiston bilan o‘yin haqida tunu kun bosh qotirmoqda. Osiyo chempionatiga qur’a tashlangan paytdayoq murabbiy o‘zbeklar jamoasini juda kuchli raqib deb baholagan edi. U guruhning ilk o‘yinidagi birinchi g‘alaba juda muhimligini tushunib turibdi. Terma jamoa Jejudo oroli va Ulsanda yig‘inlar o‘tkazgan bo‘lsa-da, hozircha musobaqaga 100% tayyor emasligi ayon. O‘zbekistonga qarshi tinmay mashg‘ulot o‘tkazish orqaligina turib berish mumkin”, — deya ta’kidlagan Janubiy Koreyaning “OSEN” nashri.

Mazkur gazeta xabariga ko‘ra, Janubiy Koreya olimpiya terma jamoasi sirpanib yiqiladigan darajada suv sepilgan maydonda mashg‘ulot o‘tkazgan. Bosh murabbiy Shin Te Yong buni “Ob-havo yoki maydon noqulayliklariga tezroq moslashish uchun tayyorgarlik”, deya izohlagan.