Футбол бўйича Жанубий Корея олимпия терма жамоаси бош мураббийи Шин Тэ Йонг январь ойида Қатарда ўтадиган Осиё чемпионатининг илк баҳсида рўбарў келадиган Ўзбекистонни гуруҳдаги энг хавфли рақиб, деб ҳисобламоқда. Бу ҳақда «Stadion.uz» маълум қилди.
«Бош мураббий Шин Тэ Йнг гуруҳдаги илк рақиб — Ўзбекистон билан ўйин ҳақида туну кун бош қотирмоқда. Осиё чемпионатига қуръа ташланган пайтдаёқ мураббий ўзбеклар жамоасини жуда кучли рақиб деб баҳолаган эди. У гуруҳнинг илк ўйинидаги биринчи ғалаба жуда муҳимлигини тушуниб турибди. Терма жамоа Жежудо ороли ва Ульсанда йиғинлар ўтказган бўлса-да, ҳозирча мусобақага 100% тайёр эмаслиги аён. Ўзбекистонга қарши тинмай машғулот ўтказиш орқалигина туриб бериш мумкин», — дея таъкидлаган Жанубий Кореянинг «ОСЕН» нашри.
Мазкур газета хабарига кўра, Жанубий Корея олимпия терма жамоаси сирпаниб йиқиладиган даражада сув сепилган майдонда машғулот ўтказган. Бош мураббий Шин Тэ Йнг буни «Об-ҳаво ёки майдон ноқулайликларига тезроқ мослашиш учун тайёргарлик», дея изоҳлаган.
Изоҳ (0)