Superog‘in vazn toifasida Jahon boks assotsiatsiyasi (WBA)ning muntazam chempioni hisoblangan o‘zbekistonlik Ruslan Chagayev Grozniyda avstraliyalik Lukas Braunga qarshi jang o‘tkazadi. Checheniston rahbari Ramzan Qodirov Instagram’dagi sahifasida ma’lum qilishicha, jang 2016-yil 5-mart kuni bo‘lib o‘tadi.
Chagayev o‘z chempionlik kamarini ilk bor 11-iyul kuni himoya qilgandi — Germaniyaning Magdeburg shahrida bo‘lib o‘tgan jangda o‘zbekistonlik bokschi italiyalik Franchesko Pyanetani texnik nokaut bilan mag‘lub etgandi. Bu kamarni Chagayev 2014-yil iyulida amerikalik Fres Okendoga qarshi Grozniyda bo‘lib o‘tgan jangdagi g‘alabadan so‘ng qo‘lga kiritgan edi.
37 yoshli Chagayev hisobida hozirgi kunga qadar 34 g‘alaba (ularning 21 tasida nokaut bilan g‘alaba qozongan), 2 mag‘lubiyat va 1 durang bor. 36 yoshli Lukas Braun esa 23 g‘alabaga erishgan bo‘lib, ularning 20 tasida raqiblarini nokaut qilgan.
Izoh (0)