Futbol bo‘yicha Yaman terma jamoasiga qarshi JCh—2018 saralash bahslari doirasidagi o‘yin O‘zbekiston termasi uchun oson bo‘lgani yo‘q. Bu haqda, O‘FF matbuot xizmati xabariga ko‘ra, Yamanga qarshi o‘yindan so‘ng O‘zbekiston milliy terma jamoasi bosh murabbiyi Samvel Babayan fikr bildirdi.
JCh—2018 saralash “H” guruhi 8-tur uchrashuvlari doirasida 17-noyabr, seshanba kuni Qatar poytaxti Dohada Yaman mehmoni bo‘lgan O‘zbekiston milliy terma jamoasi 3:1 hisobida g‘alaba qozondi. O‘zbekistonga g‘alaba keltirgan gollarga Aziz Haydarov, Server Jeparov va Stanislav Andreyev mualliflik qildi.
“O‘yinni to‘liq o‘z nazoratimizda o‘tkazdik va muhim g‘alabani qo‘lga kiritdik. Hozir biz eng kam ochko yo‘qotgan jamoa bo‘lib turibmiz. Ko‘plab muxlislar g‘alabamizni kutishgandi. Ushbu g‘alabani ularga bag‘ishlaymiz”, — dedi Samvel Babayan.
“Yamanga qarshi ikki o‘yin ham oson kechmadi. Bunga raqibning himoyadagi o‘yini sabab bo‘ldi — yamanliklar to‘pni yo‘qotish bilan darhol 10 kishi bo‘lib himoyaga o‘tdi”, — dedi O‘zbekiston termasi ustozi.
“Yamanga yaxshi mutaxassis ustozlik qilyapti. Yulduzlar, yorqin yetakchilar yo‘q bo‘lsa-da, murabbiy sharoitdan kelib chiqib yaxshi, raqobatbardosh jamoa yarata olgan”, — deya qo‘shimcha qildi Samvel Babayan.
Avvalroq Yaman terma jamoasi bosh murabbiyi Amin as-Sunayniy O‘zbekiston haqli ravishda g‘alaba qozonganini aytib o‘tgandi.
Izoh (0)