Suriyada halok bo‘lgan rossiyalik harbiy xizmatchi — Vadim Kostenkoning ota-onasi takroran tibbiy ekspertiza o‘tkazilishini so‘rab, politsiyaga ariza bilan murojaat qildi. Bu haqda Meduza xabar bermoqda.
Kostenkoning jasadi dafn etish uchun 27-oktabr kuni uning oilasi istiqomat qiladigan Krasnodar o‘lkasidagi Grechanaya Balka qishlog‘iga olib kelingan.
“Marhumning burni, bosh suyagi, bo‘yni singan, gardani majaqlangan va tizzalari shilingan. Ayni vaqtda, mazkur o‘lim holati bo‘yicha tayyorlangan rasmiy xulosada marhum asfiksiyadan vafot etgani yozilgan”, — deya xabar bermoqda “Novaya gazeta”.
Suriyadagi Vadim Kostenkoning o‘limi haqida birinchi bo‘lib bloger Ruslan Leviyev ma’lum qilgandi. Shundan so‘ng, harbiy xizmatchining vafot etgani haqidagi axborotni uning qarindoshlaridan biri “RBK” portaliga tasdiqladi. Oxiri Kostenkoning o‘limi yuzasidan Rossiya Mudofaa vazirligi bayonot berib, harbiy xizmatchi o‘z joniga qasd qilganini ma’lum qildi.
Halok bo‘lgan harbiy xizmatchining ota-onasi o‘z joniga qasd qilish haqidagi talqinga ishonmayapti. Harbiy xizmatchining o‘limi yuzasidan tekshiruv ishlarini olib borayotgan Bosh harbiy prokuratura o‘z joniga suiqasd haqidagi versiya, xususan, sud-tibbiy ekspertizasi orqali tasdiqlanganini ma’lum qilmoqda. Rossiya Mudofaa vazirligi rasmiy vakili Igor Konashenkovning so‘zlariga ko‘ra, Kostenkoning o‘limi haqida suitsiddan boshqa barcha talqinlar bo‘htondir.
Izoh (0)