GM Uzbekistan avtomobil zavodi O‘zbekiston Favqulodda vaziyatlar vazirligi bilan hamkorlikda vazirlik texnika parkini to‘ldirishga xizmat qiladigan, yengil sinfga oid avariya-qutqaruv mashinalarini yaratish ustida ish olib bormoqda. Bu haqda “O‘zavtosanoat” AK axborot xizmati “Daryo”ga xabar qildi.
Kelgusi yili ishlab chiqarilishi rejalashtirilgan yangi texnika turli shoshilinch vaziyatlarda favqulodda xizmatlarning harakatchanligi va tezkorligini ta’minlashga mo‘ljallangan. Yangi avtomobil maxsus loyihalashtirilgan texnik bo‘lmali Damas bazasida tayyorlanishi ko‘zda tutilgan bo‘lib, 5 nafar ekipaj a’zosi bemalol joylashadigan transport vositasi qutqaruv ishlari jarayonida foydalaniladigan barcha zarur uskuna va aslaha-anjomlar bilan ham ta’minlanadi.
Shuni alohida ta’kidlash kerakki, yengil avariya-qutqaruv transportini to‘ldirish va jihozlash ishlarini mazkur sohaga ixtisoslashgan boshqa kompaniyalar amalga oshiradi. FVVning Respublika miqyosidagi mavjud barcha 17 ta avariya-qutqaruv bo‘linmasida 2—3 tadan xuddi shunday jihozlangan yengil avtomobillarga ehtiyoj borligi tufayli ushbu yengil avariya-qutqaruv texnikasining dastlabki loyihasi aynan, shu soha xodimlari tomonidan ishlab chiqilgan.
“O‘zavtosanoat” AK axborot xizmatining qayd etishicha, yaqinda Favqulodda vaziyatlar vazirligi JV MAN Auto-Uzbekistan qo‘shma korxonasida MAN shassisi bazasida bunyod etilgan katta sinfga mansub maxsus transport vositalari va Samarqand avtomobil zavodida ishlab chiqarilgan o‘rta sinfga mansub Isuzu texnikalarini xarid qilgan edi.
Izoh (0)