“O‘zavtosanoat” AK avtomobillari uchun butlovchi qismlarni mahalliylashtirish mavzusida ko‘rgazma-konferensiyasi bo‘lib o‘tadi

2015-yilning 27-oktabridan 2-noyabrigacha “O‘zEkspomarkaz” milliy ko‘rgazmalar majmuida Xalqaro sanoat yarmarkasi va kooperatsiya birjasiga hamohang  tarzda  “O‘zavtosanoat” AK avtomobillari uchun butlovchi qismlarni mahalliylashtirish mavzusida ixtisoslashtirilgan ko‘rgazma-yarmarka o‘tkaziladi. Bu haqda UzAuto xabar beradi.

Mazkur tadbirni o‘tkazishdan ko‘zlangan asosiy maqsad O‘zbekistondagi tadbirkorlarning hamda  tadbirga katta qiziqish bildirgan boshqa sohalardagi korxona va  kompaniyalar vakillarining keng doirasini avtomobilsozlik tarmog‘idagi butlovchi qismlarni mahalliylashtirish jarayoniga, shuningdek, tarmoqlararo kooperatsiya va mustahkam hamkorlikni o‘rnatishga  jalb qilishdan iborat.

Ko‘rgazma ekspozitsiyasi ishtirokchilar e’tiboriga avtomobillar uchun mo‘ljallangan keng turdagi butlovchi qismlarni namoyish etishi ko‘zda tutilgan.

Mazkur konferensiyada ishtirok etish  “GM Uzbekistan” AJ, “SamAvto” MCHJ, “JV MAN Auto-Uzbekistan” MCHJ qo‘shma korxonasi,  “General Motors Powertrain Uzbekistan” AJ va  avtomobillar hamda  butlovchi qismlar ishlab chiqaruvchi  boshqa yirik kompaniyalarning shartlari va talablarini o‘rganish, ularning yirik yetkazib beruvchilariga  aylanish imkoniyatini beradi.