Ukraina Qrim va Donbass uchun Rossiyadan 1 trillion dollar miqdorida tovon puli talab qilish niyatida. Bu haqda, “Segodnya.ua” xabariga ko‘ra, Ukraina bosh vaziri Arseniy Yatsenyuk ma’lum qildi.
“Yuridik jihatdan Rossiya bilan bog‘liq ikki ishimiz bor, bu ikki yuridik ish Qrimning Rossiya tomonidan anneksiya qilinishini ham, Rossiyaning Donetsk va Lugansk viloyatlariga suqilib kirishiga ham daxldordir”, — dedi Yatsenyuk.
Ukraina bosh vazirining so‘zlariga ko‘ra, 1 trillion dollar — faqat Qrim uchun to‘lanishi kerak bo‘lgan puldir, tovon pulining yakuniy miqdori bundan ham ko‘p bo‘lishi mumkin, chunki “Donbassdagi Rossiya agressiyasi hali davom etmoqda”.
Arseniy Yatsenyukning qayd etishicha, Ukraina kompaniyalari va banklari barcha sudlarda Rossiya bilan sudlashadi.
O‘z navbatida, Rossiya prezidenti matbuot kotibi Dmitriy Peskov Ukraina bosh vazirining so‘zlariga izoh berdi: “Qrim — Rossiya hududi, Donbass esa — Ukraina hududi. Bunga 1 trillionning nima aloqasi bor? Tushunarsiz”, — dedi u.
Izoh (0)