Yaponiyalik bloger jonli efirda bexosdan uyini yoqib yubordi

Yaponiyalik Daasuke laqabi bilan mashhur bloger jonli efirda bexosdan uyini yoqib yubordi. Bu haqda Kotaku portali xabar bermoqda.

Daasuke mashhur Minecraft o‘yinining onlayn namoyishini tashkil etdi. Bunday namoyishning o‘ziga xos jihati shundaki, tomoshabinlar jonli efirda o‘yinni ham, o‘z xatti-harakatlarini izohlab boradigan blogerning o‘zini ham kuzatib borishadi. Tomoshabinlarni yangi olov yondirgich bilan hayratga solishni ko‘zlagan Daasuke yong‘in xavfsizligi qoidalariga rioya qilishni unutib qo‘ydi.

Hodisa yozuvini YouTube ham ko‘rsatdi. Videoni tomosha qilganlar soni esa 3 milliondan oshib ketdi. Kotaku portalining ma’lum qilishicha, yong‘in oqibatida Daasukening o‘zi ham, uning oilasi – 73 yoshli onasi, 68 yoshli otasi va 62 yoshli qarindoshi ham jabr ko‘rgan.