O‘zbekiston Mehnat va aholini ijtimoiy muhofaza qilish vazirligi va Yevropa Ittifoqi vakillari “O‘zbekistonning qishloq joylarida ish bilan ta’minlash ko‘nikmalarini rivojlantirish” dasturini ishga tushirish masalalarini muhokama qilishmoqda. Bu haqda “Gazeta.uz” xabar bermoqda.
Yevropa Ittifoqining mazkur tashabbusi hozirgi vaqtda O‘zbekiston hukumati, benefitsiariylar va boshqa manfaatdor tomonlar bilan batafsil muhokama qilinmoqda va kelishilmoqda. Vazirlik axborot xizmatining ma’lum qilishicha, dastur joriy yilda ishga tushishi rejalashtirilmoqda.
Dastur qishloq xo‘jaligi ishlab chiqaruvchilari uchun xizmat ko‘rsatuvchi infratuzilmani mustahkamlashni ko‘zda tutuvchi tarkibiy qismlarni, shuningdek, agrobiznes, ekoturizm va qishloq joylarda xizmat ko‘rsatish sohasi obyektlarini tashkil etish bo‘yicha ko‘nikmalarni rivojlantirishga qaratilgan ta’lim dasturlarini o‘z ichiga olgan.
Dasturni amalga oshirish masalalari 22-iyun kuni mehnat va aholini ijtimoiy muhofaza qilish vaziri Aziz Abduhakimovning Yevropa komissiyasining “Bandlik, ijtimoiy integratsiya va migratsiya” bo‘linmasi rahbari o‘rinbosari Fransuas Milkam boshchiligidagi Yevropa Ittifoqi delegatsiyasi bilan uchrashuvi vaqtida muhokama qilindi.
Tomonlar vazirlik tomonidan ilgari surilgan qishloq joylarda agrobiznes, ekoturizm, xizmat ko‘rsatish sohalarini rivojlantirish, kasb-hunar kollejlari bitiruvchilari kasbiy yo‘naltirish, shuningdek, qishloq joylarga qaytayotgan muhojirlarning startaplarini qo‘llab-quvvatlash takliflarini ham muhokama qilishdi.
Izoh (0)