Ўзбекистон Меҳнат ва аҳолини ижтимоий муҳофаза қилиш вазирлиги ва Европа Иттифоқи вакиллари «Ўзбекистоннинг қишлоқ жойларида иш билан таъминлаш кўникмаларини ривожлантириш» дастурини ишга тушириш масалаларини муҳокама қилишмоқда. Бу ҳақда «Газета.uz» хабар бермоқда.
Европа Иттифоқининг мазкур ташаббуси ҳозирги вақтда Ўзбекистон ҳукумати, бенефициарийлар ва бошқа манфаатдор томонлар билан батафсил муҳокама қилинмоқда ва келишилмоқда. Вазирлик ахборот хизматининг маълум қилишича, дастур жорий йилда ишга тушиши режалаштирилмоқда.
Дастур қишлоқ хўжалиги ишлаб чиқарувчилари учун хизмат кўрсатувчи инфратузилмани мустаҳкамлашни кўзда тутувчи таркибий қисмларни, шунингдек, агробизнес, экотуризм ва қишлоқ жойларда хизмат кўрсатиш соҳаси обектларини ташкил этиш бўйича кўникмаларни ривожлантиришга қаратилган таълим дастурларини ўз ичига олган.
Дастурни амалга ошириш масалалари 22-июнь куни меҳнат ва аҳолини ижтимоий муҳофаза қилиш вазири Азиз Абдуҳакимовнинг Европа комиссиясининг «Бандлик, ижтимоий интеграция ва миграция» бўлинмаси раҳбари ўринбосари Франсуас Милкам бошчилигидаги Европа Иттифоқи делегацияси билан учрашуви вақтида муҳокама қилинди.
Томонлар вазирлик томонидан илгари сурилган қишлоқ жойларда агробизнес, экотуризм, хизмат кўрсатиш соҳаларини ривожлантириш, касб-ҳунар коллежлари битирувчилари касбий йўналтириш, шунингдек, қишлоқ жойларга қайтаётган муҳожирларнинг стартапларини қўллаб-қувватлаш таклифларини ҳам муҳокама қилишди.
Изоҳ (0)