Poroshenko Latviya poytaxtida Kemeron, Merkel va Olland bilan uchrashdi

Ukraina prezidenti Pyotr Poroshenko Sharqiy hamkorlikning Rigadagi sammiti chog‘ida Germaniya kansleri Angela Merkel va Fransiya prezidenti Fransua Olland bilan uchrashdi. Shundan so‘ng, News.Liga.net’ning qayd etishicha, Poroshenko va Kemeron o‘rtasida uchrashuv bo‘lib o‘tgan.

Poroshenko Merkel va Olland bilan Donbassdagi voqealar rivojini muhokama qildi, suhbatdoshlar Minsk kelishuvlarining barcha bandlari, ayniqsa, o‘t ochishni to‘xtatish, og‘ir qurollarni ortga qaytarish va garovdagilarning barchasini ozod qilish kabilar bajarilishi lozimligini ta’kidlashdi.

Qo‘shimcha qilishlaricha, Poroshenko, Merkel va Olland iyun oyida Myunxenda bo‘lib o‘tadigan “Katta yettilik” mamlakatlari yetakchilari o‘rtasidagi uchrashuv arafasida “harakatlarni muvofiqlashtirib olishgan”.

Kemeron bilan uchrashuv davomida Poroshenko suhbatdoshiga Minsk kelishuvlarining bajarilishi va Donbassdagi so‘nggi hodisalar haqida, xususan, rossiyalik ikki harbiy xizmatchi qo‘lga olingani haqida axborot berdi.

Tomonlar shuningdek Donbassda tinchlikparvar kuchlar missiyasini joylashtirish imkoniyatini ham muhokama qilishdi. Kemeron Ukraina bundan buyon ham Buyuk Britaniya tomonidan ko‘rsatiladigan yordamga umid qilishi mumkinligini ta’kidladi.